Nawras



توحّشت نقلّك "توحّشتك" ، توحّشت نشدّك من يدّك و نهرب بعينيّ من عينيك ، و كيف نهرب تدخّلني فيك كيف العصفور تبوسلو راسو و تخاف عليه حتّى و إنت تخبّي فيه في حضنك ..
توحّشت نشوف البسمة في عينيك تلاجي ، و الڨمرة مرسومة في سوادهم منوّرة رموشك .. غزرتك في بهاها تضوّيلي حياتي ، محلاها كيف تغازلني و تسرقلي في غمزة كلماتي ..
توحّشت نقلّك "نحبّك" و نشبع بعبق ضحكتها كيف تتغلغل في جواجيك ، ومن بين شفايفك نعاود نسمعها ، ناخذ من حرارتها نفس عميق ، نشبع من ريحتها فيك .. نسكر بيها ، تهزّني حروفها كيف السحر ، زعمة قدّاش تحبّني ؟ و إنت تقلّي "زيدني منها" .. كيفاش غرقنا في كلمة و سحرتنا ؟
توحّشت نرقد في عينيك و نتغطّى في لهفة عينيك و نفيق و لهفتهم فيّ ، كيف التنهيدة الطويلة الّي ما توفاش .. و مزّلت نقلّك نحبّك يا أغلى من رموش عينيّ .. 
Libellés : edit post
Réactions : 
2 Responses
  1. illusions Says:

    اييييه قدّاش توحّشتك، و توحّشت كلامك و بسماتك و دنيا ورديّة ترسمها بشفرو عينيك، توحّشت نراها في غزراتك وفي لهفة يدّيك، توحّشت نسمعها من قلبك، كيف نضمّك، و في جواجيّا نخبّيك


  2. Anonyme Says:

    نقلك نحبك في منامي في يقظتي في احلامي في ضحكتي في بكيتي
    نقلك نحبك وانت بعيدة ....بعيدة على قلبي وعلى عيني
    نتمنى نرجعو سنين ونقابلك كالعادة في الطريق كيف نبداو مروحين من المعهد ونقلك نحبك ونعشقك ونهواك انت حياتي انت عمري انت حبيبتي
    انت كل شي اما خسارة كل شي وفا والي مقدر صار
    وبقيت انا عايش نحلم بيك كل يوم
    حياتي من غيرك ماعادش عندها معنى
    انا جسم من غير روح
    روحي راحت معاك
    روحي ضاعت في غابة قلبك
    روحي ماتت وادفنت
    وانا عايش جهامة عالارض
    ناكل القوت ونستنى في الموت
    (الى حبي الاول والاخير لازم يجي يوم ونتقابلوا ونقلك نحبك)


Enregistrer un commentaire

Related Posts with Thumbnails