Nawras



نحبّ نبكي في حضنك ، نحطّ راسي على كتفك ، نشمّ ترابك ، ننعس في جفنك كيف الشمس على كتف الموجة تطبطب ع الروح الممروجة بألف هات وهات .. نحبّ نقلّك يا بلادي يا الّي بالدموع حبّيناك وبالدمّ فديناك خوذ منّا بوسة وحدة ملّي عطيتنا .. إدفنها مع الّي على خاطرك مات .. إدفنها في روحك وفي دمّنا ، باسم الّي حياتو وفات وعلّمنا شنيّة الوطنيّة ، شمعناها كلمة حريّة وخلاّلنا برشة حاجات، مغروسة في رموشك ، منسيّة .. بلادي يا حنينة ، وحياة النظرة في عينك لاعاش الّي يخلّيك حزينة ويفكّ البسمة من فمّك ، لاعاش الّي غدرك قدّام عينينا وجرحك .. في بالو ترابك هديّة لسواد عينيه ، يفكّ ويستوطن فيه .. ويزيد يقسمو مع مّاليه .. نسى إلّي تونس بلاد الكلّ ، أمّ اليتامى الّي مافي قلبها لا حقد ولا غلّ ؟ على خاطرها تعطي من غير حساب يسرق و ولّى نهّاب ؟ وهاك المشويّة على كبدها ، مزّال دمّو ما شاحش ع الباب تقعد في نقبة منفيّة ؟ إنت تطالب بالزيادات وهيّ ساكتة منسيّة كإنّها ماجابت بطولات ؟ خلّيونا نفيقوا لثورتنا ، جايّين توّه نضيّعوا فيها بيدينا ؟ أحنا الّي حلمنا وبكينا ، والدموع تحرقت في عينينا ، أحنا الّي قلنا : عزّتنا ! يانعيشوا لكلّنا أحرار عيشة فلّ يا نموتوا شهداء الناس الكلّ ! أحنا الّي حلمنا بتونس لينا الكلّ .. زعمة نسينا ؟ زعمة عيينا ؟ زعمة نخلّيو الّي بديناه يضيع علينا ؟ زعمة غلطوا فينا ؟ يا توانسة يا الّي غبنوكم وزرعوا فيكم الشكّ نخلّيوهم يسرقوا الحلمة من عينينا ؟ ياتوانسة يا الّي كانت الوحدة بينكم حقّ ، فرّقونا باسم الإختلاف وحيّروا ألف مشكل فينا ؟ يا توانسة يا الّي ضربوكم بالرصاص ، يا الّي القنّاصة عبدوكم وخرجنا وغلبنا الخوف ، جايّين يخوّفو فينا توّه من بعضنا ؟ من صوابع يدينا ؟ غلّوطنا .. يا بلادي يا مسكينة .. إنت تبكي وأحنا مزّلنا نقاسيو مالمليشيات ومن هات و هات .. خوذ يا تونس ثورتنا ، خبّيها عندك ، في حضنك ووقت نفيقوا فكّرنا بالّي نسيناه وقوللنا : البارح في الأيّام حلمتوا بيّ ، حاميتوا عليّ ،حرّرتوني فرحتوا و وقت ذقتوا الحريّة نسيتوني وتحاميتوا عليّ ..

crédit photo : Hager Ben Jazia
Libellés : , edit post
Réactions : 
3 Responses
  1. Anonyme Says:

    http://www.facebook.com/?sk=messages&tid=498549006539#!/video/video.php?v=10150093107142283&comments


  2. ما أحلى غشك بالدارجة :))


  3. messi7ya Says:

    bravo !! et merci .


Enregistrer un commentaire

Related Posts with Thumbnails